അൽ-ബാഹയെ പഴമയുടെ ഓർമകളിലേക്ക് കൂട്ടിക്കൊണ്ടുപോയി ‘അൽ-അസ്സാഹ്’ കാവൽക്കാരുടെ പ്രകടനം; അൽ-അതാവില ഹെറിറ്റേജ് ഫെസ്റ്റിവലിൽ ജനത്തിരക്ക്
അൽ-ബാഹ: സൗദി അറേബ്യയുടെ തെക്കുപടിഞ്ഞാറൻ മേഖലകളിലെ ഗ്രാമങ്ങളുടെ സുരക്ഷയും ക്രമസമാധാനവും ഉറപ്പാക്കാൻ ഒരുകാലത്ത് നിയോഗിക്കപ്പെട്ടിരുന്ന പരമ്പരാഗത ഗ്രാമകാവൽ സംഘമായ ‘അൽ-അസ്സാഹ്’ വീണ്ടും ജീവന്തമായി അരങ്ങിലെത്തിയപ്പോൾ അൽ-ബാഹയിലെ സന്ദർശകർ ചരിത്രത്തിന്റെ ഇടനാഴികളിലേക്ക് തിരികെ സഞ്ചരിച്ചു. അൽ-ബാഹ മേഖലയിലെ ഒമ്പതാമത് അൽ-അതാവില ഹെറിറ്റേജ് ഫെസ്റ്റിവലിലാണ് ഈ അപൂർവ കാഴ്ചകൾ ശ്രദ്ധാകേന്ദ്രമായത്.
വാര്ത്തകൾ മുടങ്ങാതെ ലഭിക്കുവാന് ഇവിടെ ക്ളിക്ക് ചെയ്യുക
താളബദ്ധമായ മുദ്രാവാക്യങ്ങൾ, മൂർച്ചയേറിയ വിസിൽ ശബ്ദങ്ങൾ, സൈനിക ശൈലിയിലുള്ള അണിനിരപ്പുകൾ എന്നിവയോടുകൂടിയ അൽ-അസ്സാഹ് സംഘത്തിന്റെ അവതരണങ്ങൾ ഒരുകാലത്ത് ഗ്രാമജീവിതത്തിന്റെ അവിഭാജ്യഘടകമായിരുന്ന കാവൽ സംവിധാനത്തെ പുതുതലമുറയ്ക്ക് പരിചയപ്പെടുത്തുകയാണ്.
ചരിത്രരേഖകളുടെ അടിസ്ഥാനത്തിൽ പുനഃസൃഷ്ടിച്ച ഔദ്യോഗിക യൂണിഫോമുകളണിഞ്ഞ കലാകാരന്മാർ, ഗ്രാമങ്ങളുടെ സുരക്ഷയും പൊതുക്രമവും ഉറപ്പാക്കാൻ ചുമതല വഹിച്ചിരുന്ന കാവൽക്കാരുടെ ജീവിതരീതിയും ചുമതലകളും പ്രകടനങ്ങളിലൂടെ അവതരിപ്പിച്ചു. ഗ്രാമങ്ങളിലെ ദൈനംദിന ജീവിതത്തിൽ നിന്ന് ഏറെക്കാലം മുമ്പേ അപ്രത്യക്ഷമായ ഈ പാരമ്പര്യത്തെ നേരിൽ കാണാൻ വലിയ ജനക്കൂട്ടമാണ് ഫെസ്റ്റിവലിലേക്ക് ഒഴുകിയെത്തുന്നത്.
ക്രമശുദ്ധമായ പരേഡുകളും ആചാരപരമായ സൈനിക പരിശീലനപ്രകടനങ്ങളും ഉൾക്കൊള്ളുന്ന അവതരണങ്ങൾ സന്ദർശകരുടെ പ്രധാന ആകർഷണമായി മാറിയിട്ടുണ്ട്. കാവൽക്കാരോടൊപ്പം ചിത്രങ്ങൾ പകർത്താനും അവരുടെ ചരിത്രപരമായ പങ്കിനെക്കുറിച്ച് അറിയാനും നിരവധി പേരാണ് എത്തുന്നത്.
ചരിത്രത്തിന്റെ യഥാർത്ഥ ഭാവം നിലനിർത്തുന്നതിനായി അൽ-അസ്സാഹ് കാവൽക്കാർ ധരിച്ചിരുന്ന ഒലീവ് പച്ചനിറത്തിലുള്ള പാന്റും ഷർട്ടും ബെൽറ്റും ഗുത്റയും സൈനിക ബൂട്ടുകളും അവർ ഉപയോഗിച്ചിരുന്ന സർക്കാർ അനുവദിച്ച തോക്കുകളും ഉൾപ്പെടെ പഴയ ഔദ്യോഗിക വേഷധാരണം ഫെസ്റ്റിവൽ സംഘാടക സമിതി അതേപടി പുനർനിർമിച്ചിട്ടുണ്ട്.
അൽ-അസ്സാഹ് പ്രകടനങ്ങൾക്ക് പുറമെ എല്ലാ പ്രായക്കാരെയും ആകർഷിക്കുന്ന നിരവധി സാംസ്കാരിക-വിനോദ പരിപാടികളും ഫെസ്റ്റിവലിന്റെ ഭാഗമായി ഒരുക്കിയിട്ടുണ്ട്. പരമ്പരാഗത കലാരൂപങ്ങൾ, കുടുംബസൗഹൃദ വിനോദങ്ങൾ, പൈതൃക അനുഭവങ്ങൾ എന്നിവയിലൂടെ അൽ-ബാഹയുടെ സമ്പന്നമായ സാംസ്കാരിക പൈതൃകം പരിചയപ്പെടുത്തുന്ന ഫെസ്റ്റിവൽ, ചരിത്രവും പ്രകൃതിയും ജീവനുള്ള പാരമ്പര്യങ്ങളും ഒരുമിക്കുന്ന വിനോദസഞ്ചാര കേന്ദ്രമായി മേഖലയെ ഉയർത്തിക്കാട്ടാനുള്ള ശ്രമങ്ങൾക്കും കരുത്തേകുകയാണ്.
