ജിദ്ദയിലെ നിർമാണ കെട്ടിടത്തിൽ തീപിടിത്തം; വേഗത്തിൽ നിയന്ത്രണവിധേയമാക്കി, ആളപായമില്ല
ജിദ്ദ: ജിദ്ദയിലെ അബ്ഹർ അൽ-ജനൂബിയ (ദക്ഷിണ അബ്ഹർ) പ്രദേശത്ത് നിർമാണം പുരോഗമിച്ചുകൊണ്ടിരുന്ന കെട്ടിടത്തിൽ തീപിടിത്തമുണ്ടായെങ്കിലും ജിദ്ദ സിവിൽ ഡിഫൻസിന്റെ സമയോചിത ഇടപെടലിൽ തീ പൂർണമായും അണച്ചു. സംഭവത്തിൽ ആളപായമോ പരിക്കുകളോ റിപ്പോർട്ട് ചെയ്തിട്ടില്ല.
വാര്ത്തകൾ മുടങ്ങാതെ ലഭിക്കുവാന് ഇവിടെ ക്ളിക്ക് ചെയ്യുക
നിർമാണ സ്ഥലത്ത് ഇരുമ്പ് മുറിക്കുന്നതിനിടെ ഉണ്ടായ തീപ്പൊരിയാണ് തീപിടിത്തത്തിന് കാരണമായതെന്നാണ് പ്രാഥമിക അന്വേഷണത്തിൽ വ്യക്തമായത്. തീ പടരുന്നതായി ശ്രദ്ധയിൽപ്പെട്ട ഉടൻ സിവിൽ ഡിഫൻസ് സംഘങ്ങൾ സ്ഥലത്തെത്തി രക്ഷാപ്രവർത്തനം ആരംഭിക്കുകയും തീ കൂടുതൽ വ്യാപിക്കുന്നത് തടഞ്ഞ് നിയന്ത്രണവിധേയമാക്കുകയും ചെയ്തു.
തൊഴിലാളികളെയും സമീപവാസികളെയും സുരക്ഷിതരാക്കി മാറ്റിയ ശേഷമാണ് അഗ്നിശമന പ്രവർത്തനങ്ങൾ പൂർത്തിയാക്കിയത്. സംഭവത്തിൽ തൊഴിലാളികൾക്കോ പൊതുജനങ്ങൾക്കോ പരിക്കേറ്റിട്ടില്ലെന്ന് ബന്ധപ്പെട്ട അധികൃതർ സ്ഥിരീകരിച്ചു.
അതേസമയം, നിർമാണ മേഖലകളിൽ വെൽഡിങ്, ഇരുമ്പ് മുറിക്കൽ തുടങ്ങിയ ജോലികൾ നടത്തുമ്പോൾ സുരക്ഷാ മാനദണ്ഡങ്ങൾ കർശനമായി പാലിക്കണമെന്ന് സിവിൽ ഡിഫൻസ് വീണ്ടും ഓർമ്മിപ്പിച്ചു. ഇത്തരം ജോലികളിൽ നിന്ന് ഉയരുന്ന തീപ്പൊരികൾ സമീപത്തുള്ള എളുപ്പത്തിൽ കത്തുന്ന വസ്തുക്കളിലേക്ക് പടർന്ന് അപകടങ്ങൾക്ക് കാരണമാകാൻ സാധ്യതയുള്ളതിനാൽ ആവശ്യമായ മുൻകരുതലുകൾ സ്വീകരിക്കണമെന്നും അധികൃതർ നിർദേശിച്ചു.
