സൽമാൻ രാജാവിന്റെ സമ്മാനം; 1,000 ഉംറ തീർഥാടകർക്ക് സൗജന്യ ആതിഥ്യം
♠ അസ്മ ജംഷീദ്
റിയാദ്: ലോകത്തിന്റെ വിവിധ ഭാഗങ്ങളിൽ നിന്നുള്ള 1,000 പുരുഷ-വനിതാ ഉംറ തീർഥാടകരെ സ്വന്തം ചെലവിൽ ആതിഥേയരാക്കാൻ സൗദി ഭരണാധികാരിയും വിശുദ്ധ ഹറമുകളുടെ സേവകനുമായ സൽമാൻ രാജാവ് അനുമതി നൽകി. ഹജ്ജ്, ഉംറ, സന്ദർശനം എന്നിവയ്ക്കായുള്ള “വിശുദ്ധ ഹറമുകളുടെ സേവകന്റെ അതിഥി പദ്ധതി” പ്രകാരമാണ് ഈ സംരംഭം നടപ്പാക്കുന്നത്. പദ്ധതി ഇസ്ലാമിക കാര്യ മന്ത്രാലയം, കോൾ ആൻഡ് ഗൈഡൻസ് ആണ് നടപ്പിലാക്കുന്നത്.
വാര്ത്തകൾ മുടങ്ങാതെ ലഭിക്കുവാന് ഇവിടെ ക്ളിക്ക് ചെയ്യുക
ഈ ഹിജ്റ വർഷത്തിൽ (1448 ഹിജ്റ) നാല് ഘട്ടങ്ങളിലായി നടപ്പാക്കുന്ന പദ്ധതിയുടെ ആദ്യഘട്ടത്തിൽ 16 ഏഷ്യൻ രാജ്യങ്ങളിൽ നിന്നുള്ള 250 ഉംറ തീർഥാടകർക്ക് അവസരം ലഭിക്കും. ഇന്തോനേഷ്യ, കിഴക്കൻ തിമോർ, ഫിലിപ്പീൻസ്, മലേഷ്യ, കംബോഡിയ, തായ്ലൻഡ്, വിയറ്റ്നാം, മ്യാൻമർ, ലാവോസ്, സിംഗപ്പൂർ, ചൈന, ജപ്പാൻ, കൊറിയ, ഹോങ്കോങ്, തായ്വാൻ, മംഗോളിയ എന്നീ രാജ്യങ്ങളിൽ നിന്നുള്ളവരാണ് ആദ്യ സംഘത്തിൽ ഉൾപ്പെട്ടിരിക്കുന്നത്.
ഇസ്ലാമികകാര്യ, ദഅ്വാ, മാർഗനിർദേശ മന്ത്രി കൂടിയായ പദ്ധതിയുടെ ജനറൽ സൂപ്പർവൈസർ ഷെയ്ഖ് അബ്ദുല്ലത്തീഫ് അൽ-ഷെയ്ഖ് രാജാവിനും കിരീടാവകാശിക്കും നന്ദി രേഖപ്പെടുത്തി. ലോകമെമ്പാടുമുള്ള മുസ്ലിംകൾക്ക് ഉംറ നിർവഹിക്കാനും വിശുദ്ധ സ്ഥലങ്ങൾ സന്ദർശിക്കാനും സൗകര്യമൊരുക്കുന്നതിൽ സൗദി നേതൃത്വത്തിന്റെ തുടർച്ചയായ പരിഗണനയും പ്രതിബദ്ധതയും അദ്ദേഹം പ്രശംസിച്ചു.
മുസ്ലിം സമൂഹങ്ങൾ തമ്മിലുള്ള സാഹോദര്യബന്ധം ശക്തിപ്പെടുത്താനുള്ള നേതൃത്വത്തിന്റെ ആഗ്രഹത്തിന്റെ പ്രതിഫലനമാണ് ഈ പദ്ധതി എന്നും, ലോകമെമ്പാടുമുള്ള പണ്ഡിതന്മാരുമായും മതനേതാക്കളുമായും സമൂഹത്തിലെ സ്വാധീനമുള്ള വ്യക്തികളുമായും ആശയവിനിമയത്തിന്റെയും സഹകരണത്തിന്റെയും പാലങ്ങൾ പണിയാനുള്ള സൗദി അറേബ്യയുടെ മാനുഷിക-മതപരമായ ദൗത്യത്തെ ഇത് അടിവരയിടുന്നതായും ഷെയ്ഖ് അബ്ദുല്ലത്തീഫ് അൽ-ഷെയ്ഖ് പറഞ്ഞു.
