ലോകത്തിലെ ഏറ്റവും വലിയ ടെലിസ്കോപ്പുകളിലൊന്നുമായി നിരീക്ഷണ സമുച്ചയം; സൗദി രൂപരേഖയ്ക്ക് അംഗീകാരം
♠ അസ്മ ജംഷീദ്
റിയാദ്: ബഹിരാകാശ പഠന രംഗത്ത് വൻ മുന്നേറ്റത്തിന് വഴിയൊരുക്കുന്ന പുതിയ ജ്യോതിശാസ്ത്ര നിരീക്ഷണ സമുച്ചയത്തിന്റെ രൂപരേഖയ്ക്ക് സൗദി അറേബ്യ അംഗീകാരം നൽകി. ലോകത്തെ ഏറ്റവും വലിയ ടെലിസ്കോപ്പുകളിലൊന്നായ അത്യാധുനിക ഭീമൻ ടെലിസ്കോപ്പ് സ്ഥാപിക്കുന്ന പദ്ധതി ഇതിന്റെ ഭാഗമായാണ് നടപ്പാക്കുന്നത്.
വാര്ത്തകൾ മുടങ്ങാതെ ലഭിക്കുവാന് ഇവിടെ ക്ളിക്ക് ചെയ്യുക
സൗദിയുടെ വിഷൻ 2030 പദ്ധതിയുടെ ഭാഗമായി വികസിപ്പിക്കുന്ന ഈ നിരീക്ഷണ കേന്ദ്രം രാജ്യത്തെ ബഹിരാകാശ ഗവേഷണ-ശാസ്ത്ര പഠന മേഖലകളുടെ പ്രധാന കേന്ദ്രമായി മാറുമെന്നാണ് പ്രതീക്ഷ. അത്യാധുനിക സാങ്കേതിക വിദ്യകളാൽ സജ്ജമാകുന്ന ടെലിസ്കോപ്പ് പ്രപഞ്ചത്തിലെ ദൂരസ്ഥ നക്ഷത്രങ്ങൾ, ഗാലക്സികൾ, ഗ്രഹങ്ങൾ എന്നിവയെക്കുറിച്ചുള്ള കൂടുതൽ വ്യക്തവും ആഴത്തിലുള്ളതുമായ വിവരങ്ങൾ ശേഖരിക്കാൻ സഹായിക്കും.
രാജ്യത്തെ ഏറ്റവും അനുയോജ്യമായ ഇരുണ്ട ആകാശ മേഖലയിലായിരിക്കും നിരീക്ഷണ സമുച്ചയം സ്ഥാപിക്കുക. അന്താരാഷ്ട്ര നിലവാരമുള്ള ഗവേഷണ സൗകര്യങ്ങൾ, സന്ദർശക കേന്ദ്രങ്ങൾ, വിദ്യാഭ്യാസ-പരിശീലന സംവിധാനങ്ങൾ എന്നിവയും പദ്ധതിയുടെ ഭാഗമാകും.
ജ്യോതിശാസ്ത്ര ഗവേഷണ രംഗത്ത് സൗദിയെ ആഗോള ഭൂപടത്തിൽ കൂടുതൽ ശക്തമായി അടയാളപ്പെടുത്തുന്നതിനൊപ്പം, രാജ്യത്തെ യുവ ശാസ്ത്രജ്ഞർക്കും ഗവേഷകർക്കും പുതിയ അവസരങ്ങൾ സൃഷ്ടിക്കുമെന്നാണ് അധികൃതർ വിലയിരുത്തുന്നത്. ലോകത്തെ പ്രമുഖ നിരീക്ഷണ കേന്ദ്രങ്ങളുമായി സഹകരിച്ചുള്ള ഗവേഷണ പ്രവർത്തനങ്ങൾക്കും ഈ പദ്ധതി വഴിതെളിക്കും.
