ആശ്വാസം; ഹജ്ജിനിടെ കാണാതായ അബൂബക്കർ ഹാജിയെ കണ്ടെത്തി
♠ മൂസ പാണ്ടിക്കാട്
മക്ക: ഹജ്ജ് കർമ്മങ്ങൾക്കിടെ മിനായിൽ വെച്ച് കാണാതായ വയനാട് പനമരം സ്വദേശി അബൂബക്കർ ഹാജിയെ കെ.എം.സി.സി വളണ്ടിയർമാർ സുരക്ഷിതമായി കണ്ടെത്തി. മൂന്ന് ദിവസമായി അദ്ദേഹത്തെക്കുറിച്ച് യാതൊരു വിവരവും ലഭിക്കാതിരുന്നതിനെ തുടർന്ന് കൂടെയുണ്ടായിരുന്ന തീർത്ഥാടകരും നാട്ടിലെ കുടുംബാംഗങ്ങളും കടുത്ത ആശങ്കയിലായിരുന്നു.
വാര്ത്തകൾ മുടങ്ങാതെ ലഭിക്കുവാന് ഇവിടെ ക്ളിക്ക് ചെയ്യുക
കഴിഞ്ഞ മൂന്ന് ദിവസമായി മിനായിലെയും മക്കയിലെയും വിവിധ ആശുപത്രികളിലും ഹജ്ജ് ക്യാമ്പുകളിലും അധികൃതരും സഹയാത്രികരും വ്യാപകമായ തിരച്ചിൽ നടത്തിയിരുന്നെങ്കിലും അബൂബക്കർ ഹാജിയെ കണ്ടെത്താൻ കഴിഞ്ഞിരുന്നില്ല. തുടർന്ന് കെ.എം.സി.സി വളണ്ടിയർമാർ തിരച്ചിലിന് നേതൃത്വം നൽകുകയും മക്കയുടെ വിവിധ ഭാഗങ്ങളിൽ നടത്തിയ ഊർജിതമായ അന്വേഷണത്തിനൊടുവിൽ വഴിതെറ്റി സഞ്ചരിക്കുകയായിരുന്ന അദ്ദേഹത്തെ കണ്ടെത്തുകയും ചെയ്തു.
കണ്ടെത്തിയ അബൂബക്കർ ഹാജിയെ വളണ്ടിയർമാർ ഉടൻ തന്നെ സ്റ്റേറ്റ് ഹജ്ജ് ഇൻസ്പെക്ടർ സിറാജുദ്ദീന് കൈമാറി. ആരോഗ്യനില തൃപ്തികരമാണെന്ന് ബന്ധപ്പെട്ടവർ അറിയിച്ചു.
ദിവസങ്ങളായുള്ള ആശങ്കകൾക്കും അനിശ്ചിതത്വങ്ങൾക്കും വിരാമമിട്ട് അബൂബക്കർ ഹാജിയെ സുരക്ഷിതമായി തിരിച്ചുകിട്ടിയതിൽ കുടുംബാംഗങ്ങളും സഹതീർത്ഥാടകരും വലിയ ആശ്വാസവും സന്തോഷവും പ്രകടിപ്പിച്ചു. സമയോചിതമായി ഇടപെട്ട് തിരച്ചിൽ നടത്തി അദ്ദേഹത്തെ കണ്ടെത്താൻ സഹായിച്ച കെ.എം.സി.സി വളണ്ടിയർമാർക്ക് കുടുംബവും സഹയാത്രികരും ഹൃദയം നിറഞ്ഞ നന്ദി രേഖപ്പെടുത്തി.
ഹജ്ജ് സീസണിൽ തീർത്ഥാടകരുടെ സുരക്ഷയും ക്ഷേമവും ഉറപ്പാക്കുന്നതിനായി കെ.എം.സി.സി വളണ്ടിയർമാർ നടത്തുന്ന സന്നദ്ധ സേവന പ്രവർത്തനങ്ങളുടെ മികച്ച മാതൃകയായാണ് ഈ രക്ഷാപ്രവർത്തനം വിലയിരുത്തപ്പെടുന്നത്.
