ബിനോയ് വിശ്വം എംപിയെ കർണാടക പോലീസ് മോചിപ്പിച്ചു

കാസർഗോഡ്: കർഫ്യൂ ലംഘിച്ച് പ്രതിഷേധിച്ചതിന് കസ്റ്റഡിയിലായ ബിനോയ് വിശ്വം എംപിയെ കർണാടക പോലീസ് മോചിപ്പിച്ചു. പൗരത്വ ഭേദഗതി ബില്ലിനെതിരേ മംഗളൂരുവിലെ ലാൽബാഗിലാണ് കർഫ്യൂ ലംഘിച്ച് ബിനോയ് വിശ്വം എംപി പ്രതിഷേധിച്ചത്.
മംഗളൂരുവിൽ നിന്നും കർണാടക പോലീസിന്റെ വാഹനത്തിൽ കേരള അതിർത്തിയിൽ എത്തിച്ച ശേഷം അദ്ദേഹത്തെ മഞ്ചേശ്വരം പോലീസിന് കൈമാറുകയായിരുന്നു. സിപിഐയുടെ നേതൃത്വത്തിൽ രാവിലെ ബിനോയ് വിശ്വവും സംഘവും പ്രതിഷേധം സംഘടിപ്പിച്ചത്.
പോലീസ് തേർവാഴ്ചയാണ് മംഗളൂരുവിൽ അരങ്ങേറുന്നതെന്നും പാക്കിസ്ഥാന്റെ പതിപ്പാക്കി ഇന്ത്യയെ മാറ്റാനാണ് കേന്ദ്ര സർക്കാർ ശ്രമിക്കുന്നതെന്നും ബിനോയ് വിശ്വം എംപി ആരോപിച്ചു. മാധ്യമപ്രവർത്തകരെ ജോലി ചെയ്യുന്നതിനിടെ കസ്റ്റഡിയിലെടുത്ത നടപടി ശരിയായില്ല. പ്രതിഷേധങ്ങൾ തുടരുമെന്നും ബിനോയ് വിശ്വം എംപി പറഞ്ഞു.






